Ang Alay Lakad ay isang programa ng pamahalaan na naglalayong
makailak ng pondo para sa iba't ibang mga proyektong may kinalaman sa pagpapaunlad
ng mga kabataan. Pangkaraniwan nang ginaganap ito tuwing Setyembre ng bawat taon.
Subalit sa bayan ng Pakil ginaganap ito tuwing Nobyembre o kaya'y Disyembre dahilan
na rin sa pagdiriwang ng Turumba Festival kapag Setyembre at Pistang bayan sa
Oktubre.
Ilang taon ding hindi nakapagsagawa ng Alay Lakad dito sa atin
dahil na rin sa di maiiwasang pagkakataon. Subalit sa taong ito ninais ng ating
Punong Bayan Ignacio Martinez na muling magkaroon nito kaya naman sa napakalaking
tulong ng Kababaihang Lingkod Bayan ng Pakil (KLBP) na pinamumunuan ni Dra. Gloria
Martinez, na siyang nag-isponsor ng gawaing ito ngayong taon, naisakatuparan ang
Alay Lakad 2005 sa dalawang magkahiwalay na petsa.
Unang nag-umpisa ang
Alay Lakad 2005 sa Silangang Pakil (Poblacion) noong Disyembre 2, kung saan nagtulung-tulong
ang mga opisyales ng KLBP at ng Pamahalaang Bayan upang mabuo ang programa. Nagsimula
ang Alay Lakad sa isang simpleng programa kung saa'y nagbigay ng mahalagang impormasyon
tungkol sa dito sina Konsehal Andrea Martinez, Mayor Ignacio Martinez at Vice
Mayor Ariel Fornoles. Nagbigay din ng mga pampasiglang bilang ang KLBP ng Brgy.
Burgos at Brgy. Taft. Nakailak ng P25,314.00 ang KLBP na balak gamitin sa pagpapatuloy
ng scholarship program ng samahan para sa ilang mag-aaral sa high school.
